Apirilaren 22an Ama Lurraren Nazioarteko Eguna ospatzen dugu, eta egun honek hain sinplea eta hain indartsua den idea gogorarazten digu: Lurra denon etxea dela, eta zaindu beharra daukagula. Baina oraingoan, MATERetik, sarritan ahazten den zerbait azpimarratu nahi dugu… Ama Lurra, paradoxikoki, batez ere itsasoa dela. Izatez, ez dago Lurrean orekarik itsaso osasuntsurik gabe. Izan ere, ozeanoak ez dira soilik ura: bizitza, klima eta etorkizuna ere badira.

Aurrerapauso berria: Jaizkibel-Capbreton itsasoa Europaren babesean

Berri bikaina dugu. Europako Batzordeak Jaizkibel-Capbreton itsas eremua Garrantzi Komunitarioko Leku (GKL) izendatu du Natura 2000 Sarearen barruan, munduko kontserbazio sare garrantzitsuenetako batean. Babestutako gune honek 1.500 km² inguru hartzen du, Igeldo inguruko labarretatik Higer lurmuturreraino, Capbreton-eko fosaraino hedatuz.

Euskal kostaldea eta Lapurdiko ertzak ukitzen dituen eremu hau benetako natura-santutegia da, bai habitat ugarien aniztasunagatik, bai bertan bizi diren espezieen aberastas

unagatik. Berri zoragarria da itsasoa benetako babes-neurriak merezi dituela aldarrikatzen dugunontzat.

Zer babesten du eremu honek?

GKL berriak balio ekologiko handiko habitatak eta espezieak babesten ditu, horietako asko egoera zaurgarrian daudenak:

  • Tursiops truncatus izurdea, itsas ekosistemaren funtsezko espeziea, elikatzeko eta ugaltzeko gune zabalak eta lasaiak behar dituztenak.
  • Itsaspeko arrezifeak, arrain, molusku, koral eta algaz osatutako komunitateak biltzen dituztenak, “itsasoko haurtzaindegi” gisa funtzionatuz.
  • Itsas hegaztiak, hala nola gabai allearra, martin arrunta eta ubarroi mottoduna, labar hauetan atseden eta igarobide guneak aurkitzen dituztenak.

Horrez gain, babesa lagungarria izango da eskualdean oso presente dauden mehatxuak arintzeko, hala nola isuriak, gehiegizko arrantza, nabigazio turistiko kontrolik gabea, kostaldeko urbanizazioa eta plastikoek eragindako kutsadura.

MATERetik: itsasoaren aldeko hezkuntza eta ekintza

MATERen urteak daramatzagu euskal kostaldeko uretan nabigatzen, baina baita ingurumen-hezkuntzan eta sentsibilizazioan ere. Sinesten dugu soilik ezagutzen dena babesten dela, eta horregatik gure jarduerak —ikasle, familia eta edozein adinetako bisitarientzat— itsasoa herritarrengana hurbiltzeko pentsatuak daude. 

20 urte baino gehiago daramatza MATERek eta gure komunitateak ingurune natural zoragarri hau zaintzen eta ikertzen. Tokiko itsas ondare naturala behatuz eta aztertuz, ezagutza eta konpromisoa sortu dugu, eta lan handia eginda, itsas eta lur eremu berezi honen babesa lortu dugu. Urtez urte, ingurumen-erakundeekin elkarlanean, naturazaleekin indarrak batuz, kostaldeko biodibertsitatea behatu dugu, kutsadura-mailak aztertu eta uraren kalitatea neurtu dugu gure itsasoa ezagutzeko: gure etxea delako.

Gainera, ondare natural hau gizartearengana hurbiltzeko asmoz, MATER ontzian ibilaldi interpretatiboak antolatzen ditugu Jaizkibel eta Ulia ezagutzeko (hurrengo nabigazioak: maiatzaren 4an eta 17an), eta zabor-bilketa jarduerak (apirilaren 27an) eta zaborren arrantzak (maiatzaren 18an) ere bai, herritar zientziaren bidez. Hori guztia helburu argi batekin: kontzientzia ekintzan bihurtzea.

Begiratu gure agenda eta bihurtu Ama Lurraren zaintzaren protagonista MATERen eskutik.

Eta orain, zer? Boterea gure esku dago

Eremu hau babestua izendatzea urrats erraldoia da, baina ez azkena. Ekologistak ondo diotenez, funtsezkoa da orain kudeaketa-plan egokiak onartzea, araudia betetzen dela zaintzea eta, azkenik, ingurunea zaintzeko erantzukizun kolektiboa eta indibiduala bere gain hartzea.

Gure ohiturak aldatzea planetaren norabidea aldatzea delako:

  • Erabilera bakarreko plastikoen erabilera murriztea. 
  • Tokiko eta arrantza jasangarriko arraina kontsumitzea.
  • Kontserbazio edo boluntariotza jardueretan parte hartzea.
  • Gure inguruko ekosistemen balioa zabaltzea.

Apirilaren 22 honetan, ospa dezagun urdinetik

Ama Lurraren Egunean, begira dezagun ortzimuga eta gogora dezagun itsasoa ere ama dela. Bere uretan biziaren etorkizunaren zati handi bat jokatzen dela. Eta denon artean, lurretik nahiz ontzitik, irtenbidearen parte izan gaitezkeela.

MATERetik, konpromisoz eta itxaropenez nabigatzen jarraituko dugu. Bazatoz gurekin?